Azərbaycan Qida Təhlükəsizliyi İnstitutu
Qeyd edək ki, İnstitut fəaliyyət istiqamətlərinə uyğun olaraq, öz vəzifələrini nüfuzlu beynəlxalq təşkilatlar, institutlar, dövlət və qeyri-hökumət təşkilatları, eyni zamanda hüquqi və fiziki şəxslərlə qarşılıqlı əməkdaşlıq çərçivəsində həyata keçirir. Məlum olduğu kimi, indiki dövrdə əhalinin sağlamlığının qorunmasında İSO və Codex Alimentarius kimi beynəlxalq təşkilatlar tərəfindən müəyyən edilən standartlara və HACCP sisteminə əsaslanan qida təhlükəsizliyi sisteminin formalaşdırılması prioritet hesab olunur. Qeyd edilənlərlə əlaqədar AQTİ tərəfindən bir sıra fəaliyyətlər həyata keçirilir. Bu sıraya İnstitutun Analitik Ekspertiza Mərkəzinin laboratoriyalarında qida təhlükəsizliyi, heyvan və bitki sağlamlığı ilə bağlı aparılan laboratoriya analizlərini və onların nəticələrinin Elmi Araşdırmalar Mərkəzi (EAM) tərəfindən elmi təhlilini, sahibkarlar üçün təşkil edilən elmi-nəzəri təlimləri, əhalinin qida təhlükəsizliyi sahəsində maarifləndirilməsi istiqamətində aparılan təbliğat və təşviqat işlərini və digər tədbirləri şamil etmək olar.
Onu da bildirək ki, İnstitutun nəzdində müasir və çoxfunksiyalı laboratoriya infrastrukturu formalaşıb. Bu da ölkədə sabit və dayanıqlı qida təhlükəsizliyi sisteminin qurulmasına xidmət edən etibarlı laboratoriya analizlərinin həyata keçirilməsinə zəmin yaradıb. Nəticə etibarilə İnstitutda qida təhlükəsizliyi, heyvan və bitki sağlamlığına dair zəngin elmi məlumat bazası yaranıb. EAM-in əməkdaşları tərəfindən qeyd edilən məlumat bazasına istinad olunmaqla hazırlanmış elmi məqalələr bir sıra nüfuzlu impakt faktorlu jurnallarda və beynəlxalq konfrans materiallarında dərc edilib.
